نیکی کا حکم دینے اور برائی سے روکنے کی فضیلت

بسم اللہ الرحمن الرحیم
السلام علیکم ورحمۃ اللہ وبرکاتہ
دنیا میں جس طرح کامیا ب لوگوں کا ایک معیار رکھا جاتا ہے مثلاً: ڈاکٹر ،انجینئر ،پروفیسر ،ٹیچر،وغیرہ ،ایسےہی اللہ کے ہاں بھی کامیاب اور اچھے لوگوں کا ایک معیار ہے ۔جس کی مختلف کیٹا گریز ہیں مثلا ،اللہ کا بہت زیادہ ذکر کرنے والا ،نماز کی پابندی کرنے والا ،اللہ کی مخلوق کا خیال رکھنے والا ۔۔۔۔وغیرہ۔لیکن ایک بندہ ایسا بھی ہے جو اللہ کے ہاں اس قدر مقبول ہے کہ کئی عابدوں کی عبادت ایک طرف اور اس ایک بندے کے عمل ایک طرف ہے۔ایسا کون سا بندہ ہے۔۔۔؟ تو جناب ایسا بندہ ہے ایک "باعمل عالم دین" یعنی ایک ایسا بندہ جو ہر وقت اللہ تعالیٰ کے دین کی دعوت کے لئے سرگرم ہے اور نیکی کی تلقین میں مشغول ہونے کے ساتھ برائی کے خوفناک چہرے سے بھی ڈراتا رہتا ہے۔ایسے لوگوں کے لئے ہی تو اللہ کا یہ فرمان عالی شان ہے"کنتم خیر امت اخرجت للناس تامرون بلمعروف وتنھون عن المنکر"(آل عمر ان 110)ساتھ میں ان الفاظ کا ذکر کے مومن اور غیر مومن کے درمیان فرق کی مہر بھی ثبت کر دی "والمومنون والمومنات بعضھم اولیا بعض یامرن بالمعروف وینھون عن المنکر" (توبہ71) یہاں پر امام غزالی رحمۃ اللہ علیہ کی ایک بات ذکر کرنا مناسب سمجھتا ہوں کہ وہ اپنی کتا ب الا حیا 2/280میں فرماتے ہیں کہ اللہ نے اس آیت سے مومنین کو خاص کر دیا ہے یعنی جو بندہ اس فرض سے روگردانی کرے گا گو یا وہ مومن ہی نہیں ہے۔جبکہ امام قرطبی رحمہ اللہ اپنی تفسیر 4/47 میں بیا ن کرتے ہیں کہ اس آیت مبارکہ کے ذریعے اللہ تعالی نے مومن اور منافق کے درمیان فرق کردیا ہے ۔دوسرا پہلو جو اس آیت میں رکھا گیا ہے وہ یہ ہے کہ اس میں نہ صرف مومن مردوں کو خطا ب کیا گیا ہے بلکہ اس میں مومن عورتیں بھی شا مل ہیں ۔ اور طاقت کے مطابق اس فرض کو سرانجام دینےکی پابند ہیں۔ موجودہ نام نہاد روشن خیال دور میں یہ ذمہ داری خواتین پر عام حالات سے زیادہ بڑھ کر عائد ہو تی ہے۔
حضرت ابو ذر غفاری رضی اللہ تعالی عنہ بیان کرتے ہیں کہ: کچھ لوگوں نے کہا کہ اے اللہ کے رسول ﷺ صاحب ثروت لوگ تو بہت سارا اجر و ثواب کما لیتے ہیں وہ ویسے ہی نمازیں پڑھتے ہیں،جیسے ہم پڑھتے ہیں۔اور اسی قدر روزے رکھتے ہیں جس قدر ہم رکھتے ہیں۔لیکن وہ صدقہ و خیرا ت کرتے ہیں ۔(جبکہ ہم اس کی طاقت نہیں رکھتےاور وہ یوں ہم سے سبقت لے جاتےہیں)
تو نبی ﷺ نے فرمایا :" کیا اللہ نے تمہارئے لئے ایسی چیزیں نہیں بنائیں جن کو تم بھی صدقہ کر سکتے ہو؟ یقیناً ہر تسبیح( سبحان اللہ کہنا) صدقہ ہے،ہر تکبیر (اللہ اکبر کہنا) صدقہ ہے ،ہر تمحید ( الحمد للہ کہنا ) صدقہ ہے، ہر تہلیل ( لا الہ الا اللہ کہنا ) صدقہ ہے ،امر بالمعروف اور نہی عن المنکر صدقہ ہے۔(مسلم 1006)
مذکورہ حدیث سے یہ بات روز روشن کی طر ح عیاں ہو جاتی ہے کہ امر بالمعرو ف اور نہی عن المنکر ایک ایسا صدقہ ہے جہاں تک ایک مفلوک الحال آدمی کی رسائی بھی آسانی کے ساتھ ممکن ہے۔ یہ ایک ایسا پیمانہ ہے جس سے انسان اپنے ایمان کی کمزوری اور مضبوطی کو ماپ سکتاہے ۔
نبی ﷺ نے فرمایا کہ : تم میں سے جو کوئی برائی کو دیکھے تو اس کو اپنے ہاتھ سے روکے،جو اس کی طاقت نہیں رکھتا وہ زبان سےروکے اور جو اس کی بھی طاقت نہیں رکھتا وہ کم سے کم اس کو دل میں ہی برا جانے اور یہ کمزورترین ایمان ہے"(مسلم 49)
اب آپ دیکھیں کہ ایمان کے تین درجے بنا دیے گئے اور ان کو معلق بھی برائی کے روکنے کے ساتھ کر دیا ، ہا تھ سے روکو، مضبوط ترین ایمان۔ زبان سے روکو، درمیانہ ایمان۔دونوں میں سے کسی کی طاقت نہیں رکھتے تو دل میں برا کہہ دو کمزور ترین ایمان ۔اب ہماری حالت کا اندازہ کر یں شادی بیاہ میں مہندی ، تیل ، ڈھول ،باجا کی صورت میں ڈارمے ہوتے ہیں اور ہم زبان ہلانے سے بھی قاصر ہو جاتے ہیں اور دکھ کی بات یہ ہے کہ آج کل اہل علم کے ہاں بھی ایسی چیزیں کسی حد تک پائی جاتی نظر آ رہی ہیں۔بعض لوگوں کا ایمان تو زمین کے اس حصے میں چلا گیا ہے کہ جہاں سے اس کے دل میں دستک بھی نہیں ہوتی کہ " میاں جی یہ کام برائی والا ہے" بلکہ ایسی خرافات کوانجوائے کیا جاتاہے۔
ایک چھوٹی سی مثال بس میں لگی ٹیپ سے بھی لے سکتے ہیں تاکہ بندہ اپنے ایمان کی مضبوطی اور کمزوری کا اندازہ لگا لے ہم یہ سو چ کر کچھ نہیں کہتے کہ کونسا کسی نے یہ طوفان بد تمیزی بند کر دیناہے۔ میں یہ کہتا ہوں کہ کوئی بند کرے یا نہ کرے کوئی رکے یا نہ رکے پر آپ تو اللہ کے ہاں بر ی ہیں نہ کہ آپ نے دیکھا اور ان تک حق بات کو پہنچا دیا ۔
حضرت درہ بنت ابی لھب رضی اللہ تعالی عنہ بیان کرتی ہیں۔"کہ میں نے اللہ کے رسول ﷺ سے عرض کیا ۔اے اللہ کے رسول ﷺ لوگوں میں سے بہترین شخص کون ہے ؟ تو نبی ﷺ نے فرمایا:" جو سب سے زیادہ اللہ سے ڈرنے والا ہو اور سب سے زیادہ صلہ رحمی کرنے والا ہو اور سب سے زیادہ امر بلمعروف اور نہی عن المنکر کا اہتمام کرنے والا ہو۔(مسند احمد6/432)

اس حدیث سے کسی حد تک یہ بات بھی سمجھی جا سکتی ہے کہ تقویٰ کا معیار بھی اللہ تعالی نے اسی نیکی کے حکم اور برائی سے ڈرانے کو ہی رکھا ہے۔
مندرجہ بالا مختصر سی باتوں اور احادیث کو لا کر یہ بات واضح کرنے کی کوشش کی گئی ہے ۔کہ اللہ نے ایمان ،تقویٰ، اور اپنی قربت کا معیار صرف اور صرف نیکی کا حکم دینے اور برائی سے روکنے کے کو ہی رکھاہے۔یہ ایک ایسا عمل ہے جو آج ہم کو قدم قدم پر میسر ہے لیکن ساتھ میں انتہائی مشکل کام بھی ہے کیوں کہ جیسے ہی آپ کسی کو کچھ کہتے ہیں فوراً آپ کو یہ بات سننے کو ملتی ہے ۔" جاؤ صوفی صاحب کام کرو ہم نے دیکھیں ہیں بڑے متقی جو یہ سب کرتے ہیں " یا اس قسم کے اور جملے جن کو سننے کے بعد انسان ایک بار یقیناً یہ کہتا ہے دفع کرو ان لوگوں کو جو مرضی کرتے رہیں لیکن یہ بات غلط ہے کوئی کچھ بھی کہے پر علم والوں کو یہ کام کرنا ہی ہو گا ۔ نہیں تو اللہ کے سامنے جواب دینا پڑے گا کہ علم تھا ، جانتے تھے پھر لوگوں تک کیوں نہیں پہنچایا ۔؟ تب کی ندامت آج کی مشکلات سے بہت زیادہ تکلیف دے ہو گی۔
اس لئے محبت کے ساتھ امن اور نیکی کا پیغام دیں ۔اور اپنی بساط کے مطابق ہاتھ سے روکنے کی بھی کوشش کیا کریں اللہ ہم سب کو ہمت نصیب کرے اور اپنے دین کا کام اچھے اندازسے کرنے کی توفیق دے۔
واللہ اعلم بالصواب
والسلام علیکم ورحمۃ اللہ وبرکاتہ۔

 

جزاک اللہ خیرا بھائی

 

جزاک اللہ خیرا بھائی

 

جزاک اللہ خيرا

 

نیکی کا کام کریں گے تو باتیں تو سننے کو ملیں گی لیکن اس سے کوئ فرق نہیں پڑتا اللہ تعالی ھم سب کو نیک کام کرنے برائ سے روکنے اور نیکی کا حکم دینے کی توفیق دے آمین
لیکن ھم سب مسلمانوں کی سب سے بڑی بد قسمتی یہ ھے ھم نے برائ سے روکنا تو ایک طرف برائ کو برائ کہنا بھی چھوڑ دیا

امام احمد اور امام ترمزی نے سیدنا یمامہ رضی اللہ تعالی سے روایت نقل کی ھے کہ بلاشبہ نبی کریم ﷺ نے فرمایا اس ذات کی قسم جس کے ھاتھ میں میری جان ھے تم نیکی کا حکم ضرور دو گے اور برائ سے ضرور روکو گے وگرنہ قریب ھے کہ اللہ تعالی تم پر اپنی طرف سے عزاب بھیجیں گے پھر تم ضرور اس سے دعا کرو گے لیکن وہ تمہاری دعا کو قبول نہ فرمائیں گے
اللہ تعالی ھمارے ازکار اور دعاوں کی قبولیت کی راہ میں رکاوٹوں کو دور فرمائیں آمین یا حی یا قیوم
کتاب ۔ ۔ازکارنافعہ
پروفیسر ڈاکٹر فضل الہی صاحب

 

جزاک اللہ

 

جزاکم اللہ خیرا

 

آمین یارب العالمین

واقعی ہماری اجتماعی دعائیں قبول ہونے میں یہ چیز بھی رکاوٹ بنتی ہے کہ من حیث القوم ہم برائی کو برائی اور اچھائی کو اچھائی نہیں گردانتے۔ اللہ تعالی اخلاص پر مبنی اعمال صالحہ عطا فرمائے اور قبول و منظور فرما لے

 

آمین یا حی یاقیوم

 

اصل میں مسئلہ ہی ہے کہ ہم لوگ خود ہی برائی میں اس قدر جاچکے ہیں کہ وہ برائی ہمیں برائی لگتی ہی نہیں سادہ سی مثال گھروں میں پڑے ٹی وی سے ہی لی جاسکتی ہے۔
اللہ ہم سب کو سیدھے راستے کی طر ف ہدایت دے۔(آمین)

 

آمین یا رب العالمین
جس سے ٹی وی کے بارے میں پوچھو سب کا ایک ھی جواب ھوتا ھے کہ صرف خبریں سنتے ھیں ھم جو یہاں اتنا کچھ لکھتے ھیں مسلے پوچھتے ھیں کس نے مسلہ پوچھنے کے بعد ٹی وی گھر سے نکالا کس نے مسلہ پوچھنے کے بعد تصویریں کھینچنی اور مووی بنانی بند کی اور کس نے مسلہ پوچھنے کے بعد ماں بہن بیوی بیٹی کو پردہ کروانا شروع کیا اور ھم ان عورتوں سے جن سے ھمارا پردہ بنتا ھے ان سے پردہ کیا ۔کیا ان سے کہا کہ ھمارے سامنے نہ آئیں ۔؟کون سی برائ کو ھم چھوڑتے ھیں کون سی برائ کو ھم برائ کہتے ھیں چھوٹی موٹی کسی کی برائ کرنی کسی کی چغلی کرنی کوی برائ نہیں ھم کسی کو کیا کہیں ھم خود دین پھیلانے والے ھر بات کو جاننے والے برائ کو برائ نہیں سمجھتے عمل تو بہت دور کی بات ھے دل خون کے آنسو روتا ھے کہ سب جانتے بوجھتے عمل نہیں کرتے یااللہ ھم سب کو باعمل مسلمان بنا دے آمین یا حی یاقیوم

 

وعلیکم السلام ورحمۃ اللہ وبرکاتہ
جزاک اللہ خیرا ۔ آپ سب سے درخواست ہے کہ اردو مجلس کے ذریعے نیکی پھیلانے اور برائی سے روکنے میں اپنا کردار ادا کریں ۔ کوئی بھی ایسا کام جو اللہ کے حکم کے خلاف ہے اس کے متعلق ضرور لکھیں چاہے دو یا تین سطریں ہی لیکن ضرور لکھیں ۔برائی کے پھیلنے کی ایک بڑی وجہ یہ ہے کہ برے لوگ اسے پھیلانے کے لیے اپنی مکمل صلاحیتیں استعمال کر رہے ہیں جب کہ اچھے لوگ خاموش رہ جاتے ہیں ۔ اردو مجلس پر آپ کو لکھ کر صرف ایک بٹن دبانا ہوتا ہے بنا کسی محنت کے آپ کی تحریر کتنے ہی لوگوں تک پہنچتی ہے ۔ اس موقعے کو اللہ کے دین کے لیے استعمال ضرور کریں ۔ اللہ تعالی ہم سب کی کوششیں قبول کرے ۔