نعت اللہ رے یہ رفعت و شانِ محمد ﷺ

اللہ رے یہ رفعت و شانِ محمدﷺ
قرآں میں خدا خود ہے ثنا خوانِ محمدﷺ

رحمت کی گھٹا ، زلف پریشانِ محمدﷺ
ہے شمعِ حرم عارضِ تابانِ محمدﷺ

بے چون و چراں اپنا حدیثوں پر عمل ہے
اللہ کا فرمان ہے فرمانِ محمدﷺ

بو بکر و عمر حضرتِ عثمان و علی سب
یہ چاروں ہیں گلہائے گلستانِ محمدﷺ

ہو جائیں جو ہم سنت و قرآن کے پیرو
ہوں عرش نشیں پھر یہ غلامانِ محمد ﷺ

وہ دل نہیں سینے میں ہے اک لعل بدخشاں
جس دِل میں کہ ہے الفت و ارمانِ محمدﷺ

ہجرت کی وہ شب اور وہ کفار کی یورش
کیا خوف ؟ خدا جب ہے نگہبانِ محمدﷺ

بے رنگ ہیں اب یہ مہ و خورشید کے جلوے
ہے میری نظر میں رخِ تابانِ محمدﷺ

وہ دین ہو، دنیا ہو کہ ہو رنج و مسرت
ہر حال میں ہو پیشِ نظر شانِ محمدﷺ

کیا شانِ رسالت ہے کہ موسی کے لیے بھی
چارہ نہیں جز طاعتِ فرمانِ محمدﷺ

کونین میں تابش یہ تجلی ہے اسی کی
ہے نور فشاں شمع فروزانِ محمدﷺ

تابش حجازی
​

 

بہت خوب۔ جزاک اللہ خیرا

 

بہت خوبصورت،شیرنگ کا شکریہ،جزاک اللہ خیرا

 

جزاک الله خیرا

 

بهت هی اچهی شیئرنگ
جزاک اللہ خیرا