قرآ ن و حدیث میں تحریف جائز نہیں چاہے تبلیغ کی خاطر ہو!

بسم اللہ الرحمن الرحیم
​

السلام علیکم ورحمۃ اللہ وبرکاتہ
بعض لوگوں میں تبلیغ کا جذبہ ہوتا ہے لیکن ضروری علم نہ ہونے کی وجہ سے ان کو دلائل معلوم نہیں ہوتے۔ بجائے حصول علم کی صبر آزما مشقت کے وہ آسان راستہ منتخب کرتے ہیں۔ تبلیغ کے نیک مقصد کی خاطر جھوٹ بولنے، تحریف کرنے کا راستہ۔ آپ کو ایسے بہت سے مذہبی افراد ملیں گے جو یہ معلوم ہونے کے بعد بھی کہ ان کی بیان کی گئی روایت جھوٹی ہے اسے پھیلانے سے باز نہیں آتے۔ ان کا خیال ہوتا ہے کہ چاہے جھوٹی روایت ہے لیکن لوگوں پر اثر بہت کرتی ہے۔ یہ تبلیغی تجارت ہے جو چیز عوام میں ہاتھوں ہاتھ بکے گی وہ اس کو ضرور بیچیں گے۔
تبلیغ کے اسی ناپختہ تصور کی وجہ سے نوبت یہاں تک آ گئی کہ لوگ قرآنی آیات اور احادیث کی معنوی تحریف سے بھی باز نہیں آ رہے۔ وہ چاہتے ہیں کہ تبلیغ میں انوکھی باتیں کریں جو عوام نے ان سے پہلے کسی مبلغ سے نہ سنی ہوں۔ اسی دوڑ میں آیات و احادیث کا من مرضی کا ترجمہ ہو رہا ہے۔کسی حدیث کا درست معنی کیا ہے اس سے ان کو کوئی غرض نہیں۔
سنن ابی داود کی ایک حدیث شریف ہے: لَا يَقْبَلُ اللّہ صَلَاةَ حَائِضٍ إِلَّا بِخِمَارٍ۔ ترجمہ: اللہ تعالی بالغ لڑکی کی نماز سر کی چادر کے بغیر قبول نہیں فرماتے۔
اس حدیث کا مفہوم یہ ہے کہ جب لڑکی بالغ ہو جائے تو نماز کے لباس میں سر کی چادر شامل ہونا ضروری ہے۔ اس کا یہ مطلب بھی ہے کہ سر ڈھکے بغیر اگر کوئی بالغ لڑکی نماز پڑھے گی تو وہ قبول نہیں ہو گی کیوں کہ اس میں نماز کی بنیادی شرائط کا خیال نہیں رکھا گیا۔
افسوس سوشل میڈیا پر بعض لوگ اس حدیث مبارک کا یہ ترجمہ پھیلا رہے ہیں کہ :" اللہ اس عورت کی نماز قبول نہیں کرتا جو بالغ ہونے کے بعد پردہ نہیں کرتی۔ " یہ حدیث شریف میں معنوی تحریف ہے۔ احکام دین میں تحریف وہ جرم ہے جس کی پاداش میں پہلی قومیں برباد ہوئیں۔ ہم ان کی مذمت میں اتری آیات روز تلاوت کرتے ہیں اور دعوت دین کے نام پر وہی کام کرنے چلے ہیں؟
ان لوگوں کو سمجھایا گیا کہ یہ درست ترجمہ نہیں تو بتانے لگے کہ اس ترجمے سے کون سے تبلیغی فوائد مل سکتے ہیں۔پستی کی انتہا ہے کہ رسول اللہ صلی اللہ علیہ وسلم کے الفاظ انہیں دعوتی مقاصد کے لیے کافی نہیں لگتے۔ العیاذ باللہ ۔ وہ یہ سوچنا نہیں چاہتے کہ اسے پڑھنے والی ایک بے پردہ لڑکی یہ بھی سوچ سکتی ہے کہ چوں کہ میں پردہ نہیں کرتی اس لیے مجھے نماز بھی چھوڑ دینی چاہیے کہ وہ قبول نہیں ہو گی۔ یہ اللہ کے بندوں کو اس کے دینِ رحمت سے دور لے جانے والی سوچ ہے۔
ایمان اور امانت داری کا تقاضا یہ ہے کہ ہم دین میں صرف وہ کہیں جو اللہ تعالی اور اس کے رسول صلی اللہ علیہ وسلم نے کہا ہے۔ انسانوں کے دل موم کرنا، ان پر اثر ڈالنا اس ذات کا کام ہے جو دل بدلنے پر قادر ہے۔ مخلوق کا دل بدلنے کی خاطر ہمیں اللہ کا دین بدلنے کی ضرورت نہیں۔کیا ہم یہ سادہ سی بات نہیں سمجھ سکتے کہ سچ بات پھیلانے کے لیے جھوٹ بولنے کی کیا ضرورت ہے؟ ہمیں تبلیغ کرنے سے پہلے تبلیغ کا علم حاصل کرنے کی بھی ضرورت ہے، تا کہ معلوم ہو کیسی تبلیغ درست ہے اور کیا چیز تبلیغ نہیں بلکہ شیطان کی چال ہے۔ یہ بات کسی داعی یا مبلغ کی حوصلہ شکنی کے لیے نہیں، ان کا راستہ درست ہے لیکن سمت غلط ہو رہی ہے۔ انسان ایک بار غلط سمت رخ کر لے تو سیدھے راستے سے دور نکل سکتا ہے۔ ایک مسلمان کی خیرخواہی ہمارا فرض ہے۔
اللہ ہمیں اپنی سچی محبت عطا کرے۔ ہمیں شہرت کی ہوس سے پہلے علم کی پیاس نصیب ہو۔ ہمارے دلوں میں عوامی مقبولیت سے پہلے بارگاہ الہی میں مقبول بننے کی خواہش بیدار ہو جائے تو یہ ساری مشکل آسان ہو جائے۔

 

جزاک اللہ خیرا۔ ایسی تحریف شدہ پوسٹیں بلاناغہ سوشل میڈیا پہ پوسٹ ہو رہی ہیں۔ اللہ تعالی حق اور سچ کا سیدھا راستہ ہم سب کو دکھا دئے۔ ایک عام مسلمان ڈگمگا کہ رہ جاتا ہے ایسی تفسیروں میں ۔

 

محترمہ آپی!
آپ نے بہت اچھی پوسٹ کی ہے. اس درد کو میں نے بھی محسوس کیا. لیکن کم علمی کی وجہ سے پوسٹ نہیں لکھ سکا.

اللہ آپکی محنت کو قبول فرمائے آمین

 

یہ تو عام اجازت ہوتی ہے لیکن پھر بھی اس مضمون کو رومن اردو میں ٹرانسلیٹ کرکے شیئر کرنے کی اجازت چاہتا ہوں.

 

جزاک اللہ خیرا بہت اچھی بات۔ اور سوشل میڈیم کے علماء ایسے بھی کرتے ہیں حدیث کا ایک حصہ تو صحیع اور دوسرا من گھڑت اور پھر اصل حدیث کا حوالہ لکھ دیتے ہیں۔ جس کی وجہ سے عام مسلمان دھوکہ کھا جاتا ہے۔ ابھی دو پہلے ایک حدیث موصول ہوئ۔ کتاب کا نام اور حدیث نمبر لکھا ہوا تھا۔ اور جب میں نے اس کتاب کو کھولا تو اس نمبر پر کوئ دوسری حدیث تھی۔ میں نے ان صاحب کو میسیج کیا کہ اس نمبر پر تو کوئ دوسری حدیث ہے۔ تاحال ان کا جواب نہیں آیا۔

 

جی، ایسے امیج کو ہم تک پہنچا دیا کریں۔

 

السلام علیکم و رحمۃ اللہ و برکاتہ، آپ کی وال پر جمعہ کے بارے میں ایک حدیث دیکھی۔ حوالہ ہے مسند احمد ج 2 حدیث نمبر 209۔ لیکن مسند کی مذکورہ حدیث کچھ ایسے ہے۔(((((((مسند احمد ۔ جلد دوم ۔ حدیث 209 عبداللہ بن عباس کی مرویات حَدَّثَنَا حَفْصُ بْنُ غِيَاثٍ حَدَّثَنَا حَجَّاجُ بْنُ أَرْطَاةَ عَنِ ابْنِ أَبِي نَجِيحٍ عَنْ أَبِيهِ عَنِ ابْنِ عَبَّاسٍ قَالَ مَا قَاتَلَ رَسُولُ اللَّهِ صَلَّى اللَّهُ عَلَيْهِ وَسَلَّمَ قَوْمًا حَتَّى يَدْعُوَهُمْ حضرت ابن عباس رضی اللہ عنہما سے مروی ہے کہ جناب رسول اللہ صلی اللہ علیہ وسلم نے کسی قوم سے اس وقت تک قتال شروع نہیں کیا جب تک انہیں دعوت نہ دے لی۔)))))) اگر میں غلط ہوں تو تصیح فرما دیجیے۔

 

جس کا حوالہ تھا وہ کیا حدیث تھی؟

 

اردو مجلس کے حوالے کے ساتھ ٹرانسلٹریٹ کریں تو مجھے اعتراض نہیں۔

 

جی آلریڈی کر چکا ہوں. اپنے فورم پر لگا بھی چکا ہوں

جزاک اللہ خیرا

 

سال بھر کے صیام وقیام کے اجروالی حدیث ہے ایک، اس امیج میں مترجم نے سال بھر کے تہجد ترجمہ کر دیا ہے۔ مسند احمد میں کہاں ہے یہ باقاعدہ تلاش کرنی پڑے گی۔ مجلس پر یہاں ہے http://www.urdumajlis.net/threads/جمعہ-کے-احکام-و-آداب-اور-فضائل.30215/#post-443588

 

اس کا حل یہ ہے کہ صرف مستند مطالعہ کریں، مستند پیجز، گروپس جوائن کریں۔ میری فرینڈز سے ہوتا ہوا کچھ غلط مجھ تک آئے تو ضرور لکھ دیتی ہوں کہ یہ مستند نہیں۔

 

الحديث المشار إليه رواه الترمذي (456) وغيره عَنْ أَوْسِ بْنِ أَوْسٍ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( مَنْ اغْتَسَلَ يَوْمَ الْجُمُعَةِ وَغَسَّلَ وَبَكَّرَ وَابْتَكَرَ وَدَنَا وَاسْتَمَعَ وَأَنْصَتَ كَانَ لَهُ بِكُلِّ خُطْوَةٍ يَخْطُوهَا أَجْرُ سَنَةٍ صِيَامُهَا وَقِيَامُهَا ) وصححه الشيخ الألباني رحمه الله في صحيح الترمذي .
مسند احمد کا حوالہ یہ ہے
15728 قال حدثنا عبد الرزاق قال أخبرنا ابن جريج عن عمر بن محمد عن سعيد بن أبي هلال عن محمد بن سعيد عن أوس بن أوس عن النبي صلى الله عليه وسلم قال إذا كان يوم الجمعة فغسل أحدكم رأسه واغتسل ثم غدا أو ابتكر ثم دنا فاستمع وأنصت كان له بكل خطوة خطاها كصيام سنة وقيام سنة

 

جزاک اللہ خیرا.
بہت اچھا موضوع ہے.نئ نصابی کتب میں بھی مترجمین نے اکثر یہی کام کیا ہے.ترجمہ نہیں بلکہ مفہوم اور وہ بھی اصل الفاظ سے الگ تھلگ لکھ دیتے ہیں.وقت ملا تو مثالیں پیش کروں گا.

 

آپ کا حوالہ دینے کا شکریہ۔ رومن میں لکھنے کے لیے کوئی سوفٹوئر استعمال کر رہے ہیں یا خود لکھتے ہیں؟ میرا خیال ہے اس کام کے لیے گوگل نے کوئی ایپ بنا رکھی ہے۔ پتہ کریں تا کہ توانائی بچا کر کہیں اور خرچ کی جا سکے۔

 

وایاک۔ ضرور۔ نئی نصابی کتب سے آپ کی کیا مراد ہے؟

 

تہجد والا ترجمہ کوئی اتنا غلط بھی نہیں۔ قیام اللیل کو اور کیا کہیں گے؟

 

جی آپی!
کوئی ایپ اگر ہو تو ضرور بتائیں. میں خود سے کرتا ہوں. ویسے اب ماشاء اللہ اسپیڈ تیز ہو چکی ہے. لیکن وقت تو بہرحال لگتا ہی ہے

 

یہ دیکھیے
http://www.ijunoon.com/transliteration/
اللہ آپ کے وقت میں برکت دے۔
ابھی آپ کے پاس وقت اور صلاحیت ہے اس لیے آپ کچھ بھی کر سکتے ہیں۔آج سے دس سال پہلے ہم بھی ایسے ہی جنون سے کام کرتے تھے۔ لیکن خود کو نئے نئے فورمز پر تھکانے کی بجائے کسی پرانے فورم کے ساتھ مل کر کام کریں۔ ایک اکیلا دو گیارہ۔ اردو مجلس پر مجھے کام کرتے ہوئے سات سال کا پتہ نہیں چلا کیسے گزرے۔ حالاں کہ بہت کم وقت دیا، لیکن کافی کام جمع ہو گیا۔